Bashkia e Tiranës po rrezikon seriozisht nje standard evropian. Ajo ka bllokuar procesin e zhvillimit të kalendarit të aktiviteteve që duhej të fillonin më 1 janar 2022, në kuadër të shpalljes “Kryeqyteti Evropian i Rinisë”. Rivaliteti mes administratës së Bashkisë dhe Kongresit Rinor Kombëtar, KRK – po çojnë në dështim total procesin e shpalljes së projekteve rinore të parashikuara për t’u zhvilluar gjatë këtij viti.
Në vitin 2019, në Amiens, Francë, u dha vendimi zyrtar për caktimin e Tiranës “Kryeqytet Evropian i Rinisë – 2022”. Stafeta nga kryeqyteti shqiptar u mor më 17 dhjetor 2021 në Klaipeda, Lituani. Por çfarë ka ndodhur në këto 4 muaj nga mbajtja e stafetës në duar?
Aplikimet e mbyllën por deri më sot asnjë shpallje fituesisht. Njoftimi më i fundit nga faqja zyrtare e Bashkisë Tiranës e ka shtyrë afatin e shpalljes për fundin e muajit mars 2022. Konkretisht, sipas njoftimit zyrtar: “Pas një numri rekord aplikimesh për Thirrjen e Hapur për Projekt Ide në kuadër të programit Tirana Kryeqyteti Evropian i Rinisë 2022 (EYC 2022), Kongresi Rinor Kombëtar njofton të gjithë aplikantët se jemi tani në procesin e shqyrtimit të aplikimeve dhe dokumentacionit të tyre. Njoftimet mbi statusin e aplikimit do të bëhen nëpërmjet e-mail.
Parashikojmë si më poshtë datat respektive mbi njoftimet finale: Deri më datë 25 Mars 2022 rezultatet për LOT 1: Organizata të Shoqërisë Civile. Deri më datë 30 Mars 2022 rezultatet për LOT 2 dhe LOT 3: grupe jo-formale dhe individët.
Ju falenderojmë për besimin dhe durimin që keni dëshmuar gjatë këtij procesi dhe dëshirën për t’u bërë pjesë e rrugëtimit të Tiranës si Kryeqytet Evropian i Rinisë për 2022 me projekt-idetë tuaja”. Por as ky afat nuk u respektua. Iku marsi, po ikën dhe prilli: asnjë projekt i miratuar apo financuar.
Sherr për listën e fituesve
Burime nga brenda ekipit organizator konfirmojnë për Dosja.al se ngërçi i krijuar, situata bllokuese, ka si shkak mosmarrëveshjet serioze që kanë përfaqësuesit e Bashkisë me ata të KRK për ndarjen e fondeve. Të dy palët pretendojnë të fusin si fitues subjektet që simpatizojnë. Kjo ka derfomuar tërësisht garën e projekteve. Ndërkohë aplkikantët presin. Aktivistë, artistë, animatorë, koordinatorë që kanë planifikuar të përfshihen në “Tirana Kryeqyteti Evropian i Rinisë -2022”, akoma nuk kuptojnë çfarë po ndodh. Gjithçka ka qenë e menduar se do të zhvillohet mbi bazën e projekteve. Dmth secili subjekt do të aplikonte me projekt dhe pas vlerësimit do të shpalleshin fituesit, do të lëvroheshin fondet. Por deri më tani asnjë projekt i miratuar, asnjë fond i lëvruar. Kalendari aktiviteteve zero. Propaganda bashkiake në kulmin e vet gjithësesi.
Infrastruktura moderne dhe e shtrenjtë është gati
Bashkia dhe KRK gjithësesi diçka kanë bërë. Kanë organizuar tendera për zyra, për staf shtesë, për pajisje dhe inventar teknologjik pune në funksion të “Tirana Kryeqyteti Evropian i Rinisë – 2022”. Miliona euro janë shpenzuar. Por në 4 muajt e fundit shpenzimet e konsiderueshme kanë shkuar dëm. Pasi stafet, zyrat, infrastruktura teknike e teknologjike është në tako. Fituesit e tenderave kanë marrë fondet, burimet njerëzore shtesë kanë marrë rrogat – vetëm aktivitete nuk ka. Kjo ka zbuluar një pamje tjetër të administratës së Bashkisë së Tiranës, një çorganizim të organizuar, për të mos prodhuar asgjë. Zhgënjimi është për grupet rinore të interesit nga Shqipëria, por dhe mjaft organizata e individë të huaj, që kanë aplikuar për të ardhur në kryeqytetin evropian për këtë vit. Pavarësisht kësaj propaganda është në nivel. Lajme, kronika, foto, galeri fotografike, tam tam-e të orkestrës frymore të qytetit, parakalime, intervista euforike etj etj. Vetëm aktivitetet mungojnë.
Discussion about this post