E qëlloi 5 herë me thikën e bukës, ja si burri vrasës në Fier u përpoq të fshihte krimin: Mori të vëllanë në telefon (Foto e viktimës)

Është zbardhur e plotë ngjarja e rëndë e ndodhur sot në lagjen “Sheq i Madh” në Fier.Sipas njoftimit zyrtar të policisë, autori i vrasjes është Petrit Mamaj i cili e pranoi krimin vetëm pas rezultateve të ekspertizës mjeko-ligjore. Ai i kishte ngulur thikën e bukës bashkëshortes së tij 50 vjeçare Valdete Mamaj plot 5 herë në gjoks dhe ca gërvishtje në trup.

Mësohet se pasi e la të pajetë, u nis të hante bukë në lokalin e lagjes, për të krijuar kështu ‘skenarin’ se ai nuk kishte lidhje me vrasjen.

Pasi arriti në banesë, 56 vjeçari ka marrë në telefon të vëllanë e tij i cili ishte oficer policie.

Burime bëjnë me dije se çifti kishin dy fëmijë dhe se djali i tyre ishte larguar drejt Gjermanisë vetëm një ditë më parë. Po ashtu, të njëjtat burime bëjnë me dije se viktima punonte shitëse në një dyqan në qytetin e Fierit, ndërsa bashkëshorti i saj ishte punonjës në shërbimet komunale.

Petrit Mamaj ka rrëfyer para forcave blu se e ka vrarë për motive xhelozie, ndërsa grupi hetimor po punon për zbardhjen e plotë të rrethanave të ngjarjes.

Njoftimi i Policisë:
Fier

Zbardhet dhe dokumentohet ngjarja e ndodhur mëngjesin e sotëm në lagjen “Sheq i Madh” Fier.

Pas një pune hetimore në bashkëpunim me Prokurorinë Fier, Policia arreston shtetasin P. M.,si autor i dyshuar i vrasjes së bashkëshortes së tij.

Pas njoftimit të marë në sallën operative se në lagjen “Sheq i Madh”, Fier, në banesën e saj një shtetase është vetëvrarë, menjëherë është ngritur grupi hetimor dhe në bashkëpunim me Prokurorinë Fier kanë vijuar punën për zbardhjen e plotë të rrethanave të ngjarjes.

Nga provat e grumbulluara, deklarimet e marra, këqyrjes së trupit të viktimës nga eksperti mjeko-ligjor dhe veprimet e mëtejshme hetimore të kryera nga grupi hetimor në bashkëpunim me Prokurorisë Fier, rezulton se shtetasi P. M., bashkëshorti i viktimës, për motive të dobëta ka goditur me thikë shtetasen V. M., e cila për pasojë ka gjetur vdekjen.

Në bazë të hetimeve të thelluara, i vendosur përballë provave të adminstruara, shtetasi P. M., ka pranuar autorësinë dhe motivin e ngjarjes.

Në vijim të veprimeve, specialistët për Hetimin e Krimeve në Komisariatin e Policisë Fier arrestuan në flagrancë për veprën penale “Vrasja në rrethana të tjera cilësuese”, shtetasin P. M., 56 vjeç.

U sekuestrua në cilësinë e provës materiale mjeti prerës(thikë), me të cilën dyshohet se autori ka kryer vrasjen.

Materialet do i kalojnë Prokurorisë pranë Gjykatës së Shkallës së Parë Fier, për veprime të mëtejshme procedurale.

(Foto e viktimës)